Piştî êrişa bi kêrê ya ku li Winterthura bajarê Swîsrayê pêk hat û sê kes birîndar bûn, bavê Nesip Dedelerê 31 salî ku wekî êrişkar tê naskirin, yekem car axivî. Bavê wî Ayhan Dedeler di daxuyaniyekê de ji bo rojnameya swîsî ya Blick re got ku kurê wî bi salane bi pirsgirêkên giran ên psîkolojîk re têkoşîn dike û got ku divê bûyer tenê ji aliyê “terorê” ve neyê nirxandin.
Di êrişa ku 28 Gulanê roja pêncşemê serê sibê li nêzî Stasyona Trênê ya Winterthurê pêk hat de sê kes birîndar bûn. Hat îdiakirin ku êrişkar di dema bûyerê qîriya û got “Allahu Ekber”. Piştî bûyerê, Berpirsê Ewlekariya Zürîhê Mario Fehr êriş wekî “çalakiyeke terorê” binav kir û got ku gumanbar di berê de bi derdorên radîkal re têkildar bûye.
Ayhan Dedelerê ku di dema êrişê de li Tirkiyeyê bû, li dijî ku kurê wî wekî “terorîst” were nîşankirin derket û got: “Kurê min terorîst nîne; ew nexweşê psîkolojîk e û hewcedarê alîkariyê ye.”
Bavê Dedeler qebûl kir ku kurê wî demekê li derdora Mizgefta An’Nur a Winterthurê radibû û rûdinişt di wê heyamê de ji hin ramanên radîkal bandor girt. Lê wî got ku du kurên wî yên din ku bi heman derdoran re têkilî danîbûn, bi demê re ji van ramanan dûr ketin, lê Nesip Dedeler di sazkirina jiyana xwe de zehmetî kişand.
Ayhan Dedeler got ku kurê wî gelek salan bê kar bûye û her ku çûye ji jiyana civakî dûr ketîye. Wî got: “Ne karê wî hebû ne jî derdoreke civakî ya birêkûpêk. Salan e ku ew jiyaneke girtî û tenê dijî.”
Bavê wî herwiha îdia kir ku di rojên dawî de rewşa psîkolojîk a kurê wî zêdetir xirab bûye û got ku berî êrişê razî bû ku ew li klînîkek psîkiyatrîk were bicihkirin, lê derzistina wî ya zû ji nexweşxaneyê ji bo wî me fêm nekir.
Ayhan Dedeler ji bo kesên birîndar bûne jî daxwaza saxlemiyê kir û got: “Hêviya min a herî mezin ew e ku birîndar bi tevahî baş bibin.”
Rayedarên swîsrî jî ragihandin ku lêpirsîna derbarê êrişa Winterthurê dewam dike û bûyer hem ji aliyê têkiliyên terorê hem jî ji aliyê dîroka psîkolojîk a êrişkar ve bi awayekî berfireh tê lêkolînkirin.
Çavkanî: Rojnameya Blick
Nûçe – Çand – Huner