BERN — Li dijî siyaseta Swîsreyê ya derxistina penaber û daxwazkarên penaberiyê, rêxistinên mafên mirovan, penaberên siyasî û komên piştgiriyê li ber Sekreteriya Dewletê ya Koçberiyê (SEM) li Bernê protestoyek li dar xistin.
Di protestoyê de rewşa Bahar Yalçınkaya, ku bi du zarokên xwe re ji Swîsreyê bo Tirkiyeyê hate şandin, derket pêş. Organîzatoran gotin ku Yalçınkaya piştî gihiştina Tirkiyeyê hate binçavkirin û paşê bi zaroka xwe ya 15 mehî re hate zindankirin. Li gorî agahiyên parêzerê wê, rîska girtina wê li Tirkiyeyê beriya vegerandinê ji makamên Swîsreyê re hatibû ragihandin. Di protestoyê de îddîayên ku Yalçınkaya li ber çavên zarokên xwe bi kelepçeyê ji paş ve hatibe girêdan û ji navenda vegerandinê derxistine jî hatin bilindkirin. Ev dosya di çapemeniya de jî hat ragihandin.
Beşdarên protestoyê daxwaz kirin ku makamên Swîsreyê ji bo her kesê ku tê vegerandin, rîska îşkenceyê, muameleya xirab, girtina siyasî an keyfî û binpêkirina mafên mirovan bi awayekî rojane û takekesî binirxînin.
Di protestoyê de rewşa penabera siyasî Hasan Bal jî hate bilindkirin. Li gorî organîzatoran, Bal di 6ê Tebaxê de li Sionê, kantona Valais, ji bo derxistinê hate girtin, tevî ku prosesa îtirazê ya wî hîn bi dawî nebûbû.
Protestoyan daxwaz kirin ku vegerandinên ku rîska binpêkirina mafên mirovan hene rawestin, bikaranîna hêzê di dema vegerandinê de bi awayekî serbixwe were kontrolkirin û şertên tenduristî, xwarin, cihê mayîn û paqijiyê li navendên penaberiyê baştir bibin.
Wan herwiha bang kir ku di hemû biryarên penaberiyê û vegerandinê de berjewendiya herî baş a zarokan were parastin.
Protesto bi bilbil, çepik û sloganan berdewam kir, bi peyama ku “Mafê penaberiyê û rûmeta mirovan ne mijara danûstandinê ye.”
Nûçe – Çand – Huner